Li parêzgeha Yezdê ya Îranê, otobûseke ku heciyên ji Pakistanê diçûn Kerbelayê dianî, qelibî û di encamê de 28 kes mirin û 23 kes birîndar bûn. Hat ragihandin ku qeza ji ber xeletiya sîstema tirmuzê pêk hatiye.
Li gorî nûçeya medyaya dewletê ya Îranê, qeza şeva sêşemê li navenda welêt, li parêzgeha Yezdê qewimî.
Reuters radigihîne ku li gorî lêkolîna pêşîn a polîsan, sedema qezayê wek xeletiya di sîstema tirmuzê ya otobûsê de hatiye destnîşankirin. Rêveberê rêveberiya krîzê yê parêzgehê Elî Melekzade, di daxuyaniya xwe ya ji televîzyona dewletê re da got ku 23 rêwî jî birîndar bûne û rewşa heftan ji wan giran e.
Melekzade eşkere kir ku ji yên ku di qezayê de canê xwe ji dest dane, 11 jin û 17 mêr in. Li gorî nûçeya rojnameya Dawn News a Pakistanê, tê texmînkirin ku di dema qezayê de 53 kes di otobûsê de hebûne. Di nav rêwiyan de heciyên ji bajarên Larkana û Ghotkî yên parêzgeha Sindê ya Pakistanê jî hebûn.
Li gorî nûçeyên medyaya herêmî, otobûs li ber nuqteya kontrolê ya Dehşîr-Taftê, ku 681 kîlometre li başûrê paytextê Tehranê ye, agir girt. Melekzade sedemên qezayê wiha rave kir: “Ji ber ku şofêr nikaribû wesayitê kontrol bike, rê nas nedikir, leza zêde û pirsgirêkên teknîkî, otobûs ji rê derket.”
Bertekên ji Pakistanê
Serokkomarê Pakistanê Asif Elî Zerdarî ragihand ku wî wezareta karên derve xistiye tevgerê da ku cenazeyên kesên di qezayê de mirine bînin welêt û alîkariyê bigihînin birîndaran. Wezîrê Karên Hundirîn Mohsîn Neqvî jî got: “Em ji ber windakirina jiyana mirovan di qezaya otobûsê ya li Îranê de xemgîn in.”
Ji konsolosxaneya Pakistanê ya li Îranê hat xwestin ku di xebatên rizgarkirinê de alîkariyê bike. Balyozê welatî yê li Tehranê Mihemed Mudessir Tîpu ragihand ku ew bi hikûmeta Îranê û rayedarên herêmî yên li Yezdê re di têkiliyê de ye.
Rêwîtiya Erbaînê çi ye?
Heciyên ku di qezayê de canê xwe ji dest dan, ji parêzgeha Sindê ya Pakistanê diçûn bajarê pîroz ê Kerbelayê yê Iraqê da ku Erbaînê bi bîr bînin, ku yek ji mezintirîn bûyerên di salnameya Şiî de ye. Erbaîn dawiya serdema 40 rojî ya şînê ji bo Îmam Huseyîn ê neviyê Hz. Mihemed nîşan dide. Niha nêzîkî du milyon heciyên Misilmanên Şiî beşdarî vê çalakiya bibîranînê dibin.
Medyascope'un günlük e-bülteni
Andaç'a abone olun
Editörlerimizin derlediği öngörüler, analizler, Türkiye’yi ve dünyayı şekillendiren haberler, Medyascope’un e-bülteni Andaç‘la her gün mail kutunuzda.
Çavkani: BBC
