Hevserokê Giştî yê DEM Partiyê, Tuncer Bakırhan li hemberî jêbirina nivîsên trafîkê yên bi kurdî û qanûna nû ya parastina heywanan helwest nîşan da. Bakırhan got ku ew ê vê qanûnê qebûl nekin û pêk neynin.
Li bajaroka Edremitê ya Wanê, piştî Çalakiya Jinan a Rêveberiyên Herêmî yên Demokratîk a DEM Partiyê, bi beşdariya hemû hevserokên şaredariyan Çalakiya Rêveberiyên Herêmî yên Demokratîk hat lidarxistin. Hevserokê Giştî yê DEM Partiyê Tuncer Bakırhan, di daxuyaniya xwe de li hemberî jêbirina nivîsên trafîkê yên bi kurdî û qanûna nû ya parastina heywanan ku ji Meclisê derbas bû, nerazîbûn nîşan da.
Di çalakiyê de gelek kesayetiyên girîng ên wek Tülay Hatimoğulları, Çiğdem Kılıçgün Uçar, Keskin Bayındır, Neslihan Şedal, Abdullah Zeydan, Serra Bucak, Doğan Hatun, Devrim Demir, Ahmet Türk, Gültan Kışanak, Sebahat Tuncel û Çağlar Demirel beşdar bûn.
Bakırhan di axaftina xwe de got: “Em bi desthilatdariyeke kemînî re rû bi rû ne. Li tu welatên cîhanê wiha tiştekî tune. Ev desthilatdariya kemînî li Wanê heman rêbaz ceriband, lê rastî îradeya gel hat. Her tişt kirin, niha dor hatiye nivîsên ku ji bo hêsankirina trafîkê hatine nivîsandin. Her êvar, wek ku li welatî derbe çêbûbe, wan nivîsan jê dibin. Niha jî êrîşî govend û dîlanan dikin.”
Bakırhan domand: “Madem ji ‘Pêşî Peya’ fêm nakin, em ê ‘Berî her tiştî mirov bin’ jî lê zêde bikin.” Wî herwiha derbarê qanûna parastina heywanan de jî got: “Ji vir bangî we dikim, em ê vê qanûnê nas nekin û pêk neynin. Bajar, kolan û cadde çiqas ên mirovan in, ewqas jî yên candarên din, kûçik û pişîkan in.”
Abdullah Zeydan, Hevserokê Şaredariya Bajarê Mezin a Wanê, di axaftina xwe de bal kişand ser bandora neyînî ya qeyûman û got: “Qeyûm ne tenê wêrankirina aborî ye, di heman demê de asîmîlasyon û zirarên li dijî gelan in. Qeyûm li ser bingeha talankirina dîroka me, çanda me û hemû nirxên me hatibûn avakirin.”
Zeydan got ku digel hemû astengîyan, ew ê xebatên şaredariya pirzimanî bidomînin.
