Edîtorên Medyascope ji Tirkiyeyê heta cîhanê nûçeyên girîng ên rojê ji bo we berhev kirin.
Aloziya di navbera Partiya Tevgera Neteweyî (MHP) û Partiya Wekhevî û Demokrasiyê ya Gelan (DEM Partî) kûrtir dibe. Piştî daxuyaniya Serokê MHP’ê Devlet Bahçelî ya derbarê qutkirin û rawestandina alîkariyên xezîneyê yên ji bo DEM Partiyê, naha jî Cîgirê Serokê Giştî yê MHP’ê Semih Yalçin, piştî daxuyaniya DEM Partiyê, bi gotinên heqaretbar bersivek da.
Li gorî nûçeya Pêşrew Mehdî ya Kurdistan Chronicle, Berîvan Celal, ya ku li Helebceyê hatiye dinyayê, bi serkeftinên xwe yên di futsalê de bû şampîyona navdar a Iraqê. Celal, bi bidestxistina Kupa Rojavaya Asyayê di sala 2022an de, stereotîpên li ser jinên futbolîst şikandin û bû mînakek ji bo nifşên nû.
Li Dêrsimê otomobîlek bi kamyonekê re lihevket û qezayeke giran çêbû. Di encama bûyerê de du kes, zarokek pênc salî û ciwanekî bîst û heşt salî, tevî hemû mudaxeleyan jiyana xwe ji dest dan û şeş kes jî birîndar bûn.
Fîlê dawîn ê baxçeyê ajalan ê Afrîkaya Başûr, Charlie, piştî 40 salên dîlîtiyê, veguherî herêma parastinê ya taybet a Shambala li eyaleta Limpopo. Charlie bi encama kampanyayên alîgirên mafên ajalan ên ku salan dom kirin gihîşt jîngeha xwe ya xwezayî.
Rûsya daxuyand ku nêzîkbûna di navbera Enqere û Şamê de ji bo çareserkirina pevçûna Sûriyê girîng e û amade ye ku di vî warî de alîkariyê bike. Wezareta Karên Derve ya Rûsyayê destnîşan kir ku ew piştgiriya hemû hewldanên ji bo normalîzekirina têkiliyên di navbera her du welatan de dikin.
